യോഗിക്ക് ജനവിധി തേടാന്‍ ധൈര്യം പോര; നിയമസഭയിലേക്ക് മല്‍സരിക്കാതെ മുഖ്യമന്ത്രിയായി തുടരാന്‍ കൗണ്‍സിലേക്ക് മത്സരിക്കും

ലക്നൗ: ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് വോട്ടര്‍മാരെ നേരിടാതെ ഊടുവഴിയിലൂടെ അധികാരത്തില്‍ തുടരാന്‍ നീക്കം.
യോഗി നിയമസഭ ഉപതെരഞ്ഞെടുപ്പില്‍ മല്‍സരിക്കില്ല പകരം ഉത്തര്‍പ്രദേശിലെ നിയമസഭാ കൗണ്‍സിലിലേക്ക് മല്‍സരിക്കാനാണ് തീരുമാനം. നിയമസഭയിലേക്കാണെങ്കില്‍ ഉപതെരഞ്ഞെടുപ്പില്‍ മല്‍സരിക്കുകയും ജയിക്കുകയും വേണം. പക്ഷെ പരാജയപ്പെട്ടാല്‍ മുഖ്യമന്ത്രി കസേര തെറിക്കും. എന്നാല്‍ ഉത്തര്‍പ്രദേശില്‍ ലെജിസ്ലേറ്റീവ് കൗണ്‍സില്‍ സംവിധാനമുള്ളതിനാല്‍ ഇതിലേക്ക് തെരഞ്ഞെടുത്താലും അധികാരത്തില്‍ തുടരാം. ജനങ്ങളുടെ വോട്ടില്ലാതെ നാമനിര്‍ദേശത്തിലൂടെ കൗണ്‍സിലില്‍ അംഗമാകാം. നിയമസഭയിലെ നിലവില്‍ മൃഗീയ ഭൂരിപക്ഷം വെച്ച് ബിജെപിക്ക് ഇത് അനായാസം സാധിക്കും.

എംഎല്‍എ ആകാത്തവര്‍ അധികാരത്തിലെത്തി 6 മാസത്തിനകം തെരഞ്ഞെടുപ്പ് നേരിടണമെന്നാണ് ചട്ടം. നിലവില്‍ എംപിയായ യോഗി ആദിത്യനാഥിന് മുഖ്യമന്ത്രിയായി തുടരാന്‍ നിയമസഭയിലേക്ക് തെരഞ്ഞെടുക്കപ്പെടുകയോ നിയമസഭ കൗണ്‍സിലേക്ക് നാമനിര്‍ദേശം ചെയ്യപ്പെട്ട് വിജയിക്കുകയോ വേണം. ഈ സാഹചര്യത്തിലാണ് ബിജെപി എളുപ്പ വഴി സ്വീകരിച്ചത്. ആദിത്യനാഥിനു പുറമെ ഉപ മുഖ്യമന്ത്രിമാരായ കേശവ് പ്രസാദ് മൗര്യ, ദിനേശ് ശര്‍മ, മന്ത്രി സ്വതന്ത്രദേവ് സിങ് എന്നിവരും ഇതേവഴിയാണ് പിന്തുടരുന്നത്. വരാന്‍ പോകുന്ന എംഎല്‍സി തിരഞ്ഞെടുപ്പില്‍ ഇവരുടെ പേരുള്ള പട്ടിക ബിജെപി പുറത്തിറക്കി.

മാര്‍ച്ച് 19ന് അധികാരത്തിലേറിയ യോഗിക്ക് സെപ്തംബര്‍ 19ന് ഉള്ളില്‍ നിയമസഭയിലേക്കോ കൗണ്‍സിലിലേക്കോ എത്തിയില്ലെങ്കില്‍ കസേര നഷ്ടപ്പെടും. ഉപതെരഞ്ഞെടുപ്പിന് നാമനിര്‍ദേശ പത്രിക സമര്‍പ്പിക്കേണ്ട അവസാന തിയ്യതി സെപ്തംബര്‍ 5 ആണ്. 15ന് ആണ് ലെജിസ്ലേറ്റീവ് കൗണ്‍സിലിലേക്കുള്ള തെരഞ്ഞെടുപ്പ് നടക്കുക. യോഗിയുടെ മുന്‍ഗാമികളായ യുപി മുഖ്യമന്ത്രിമാരും ഇതേ കൗണ്‍സില്‍ വഴിയാണ് അധികാരത്തില്‍ തുടര്‍ന്നത്. സമാജ്വാദി പാര്‍ട്ട് മുഖ്യമന്ത്രിയായ അഖിലേഷ് യാദവും ബിഎസ്പിയുടെ മായാവതിയുമെല്ലാം നിയമസഭയ്ക്ക് പകരം ലെജിസ്ലേറ്റീവ് കൗണ്‍സില്‍ അംഗങ്ങളായിരുന്നു.

ഗോരഖ്പൂരിലെ ശിശുമരണങ്ങള്‍ വലിയ രീതിയില്‍ വാര്‍ത്തയാകുകയും യോഗി സര്‍ക്കാരിനെതിരെ എതിര്‍പ്പുയരുകയും കൂടി ചെയ്ത സാഹചര്യത്തിലാണ് നേരിട്ട് തെരഞ്ഞെടുപ്പ് നേരിടാതെ ലെജിസ്ലേറ്റീവ് കൗണ്‍സില്‍ വഴി അധികാരം ഉറപ്പിച്ചുനിര്‍ത്താനുള്ള ബിജെപി മുഖ്യമന്ത്രിയുടെ തന്ത്രം.

SHARE