പൗരത്വം തെളിയിക്കാന്‍ 127 പേര്‍ക്ക് നോട്ടീസ്; നടപടി വിവാദത്തില്‍

ഹൈദരാബാദ്: ഇന്ത്യന്‍ പൗരന്മാരാണെന്ന് തെളിയിക്കണമെന്നാവശ്യപ്പെട്ട് ഹൈദരാബാദിലെ 127 മുസ്‌ലിം, ദളിത് വിഭാഗക്കാര്‍ക്ക് യുണീക്് ഐഡന്റിഫിക്കേഷന്‍ അതോറിറ്റി (യു.ഐ.ഡി.എ.ഐ) നോട്ടീസ് നല്‍കിയത് വിവാദത്തില്‍. വ്യാജ മാര്‍ഗങ്ങളിലൂടെ ആധാര്‍ നമ്പറുകള്‍ നേടിയിട്ടില്ലെന്ന് തെളിയിക്കാനാവശ്യപ്പെട്ട് ഫെബ്രുവരി 3നാണ് അതോറിറ്റിയുടെ ഹൈദരാബാദ് റീജിയണല്‍ ഓഫീസ് നോട്ടീസ് നല്‍കിയത്.
ഇവര്‍ ഇന്ത്യന്‍ പൗരന്മാരല്ലെന്ന പരാതി ഉയര്‍ന്നതിനെത്തുടര്‍ന്നാണ് നടപടി. ആരോപണത്തിന്റെ സത്യാവസ്ഥയെക്കുറിച്ച് റീജിയണല്‍ ഓഫീസ് അന്വേഷണം ആരംഭിച്ചതായും അവരുടെ പൗരത്വം തെളിയിക്കുന്നതിനായി അന്വേഷണ ഉദ്യോഗസ്ഥന്‍ അമിത ബിന്ദ്രൂ മുമ്പാകെ ഫെബ്രുവരി 20ന് രേഖകള്‍ ഹാജരാക്കാനുമാണ് നിര്‍ദേശം. രേഖകള്‍ ഹാജരാക്കുന്നതില്‍ പരാജയപ്പെട്ടാല്‍ ആധാര്‍ നമ്പറുകള്‍ റദ്ദ് ചെയ്യും. എന്നാല്‍ പൗരത്വം തെളിയിക്കാനായി കണക്കാക്കുന്ന രേഖകള്‍ എന്തൊക്കെയെന്ന് നോട്ടീസില്‍ വ്യക്തമാക്കിയിട്ടില്ല.
ആധാര്‍ ആക്റ്റ് 2016 പ്രകാരം ആധാര്‍ നമ്പറുകള്‍ ഒരു വ്യക്തിയുടെ താമസ സ്ഥലവുമായി ബന്ധിപ്പിക്കുന്ന രേഖയാണ്. അതിനാല്‍ യുഐഡിഐഐക്ക് പൗരത്വം തെളിയിക്കാന്‍ ആവശ്യപ്പെടാന്‍ നിയമസാധുതയില്ല. ഹൈദരാബാദില്‍ 127 പേര്‍ വ്യാജ രേഖകള്‍ നല്‍കി ആധാര്‍ സ്വന്തമാക്കിയതായി റീജിയണല്‍ ഓഫീസിന് റിപോര്‍ട്ടുകള്‍ ലഭിച്ചതായും പ്രാഥമിക അന്വേഷണത്തില്‍ അവര്‍ രേഖപ്പെടുത്താത്ത കുടിയേറ്റക്കാരാണെന്ന് കണ്ടെത്തിയെന്നും അതോറിറ്റി സ്ഥിരീകരിച്ചു. പൗരത്വ ഭേദഗതി നിയമത്തിനും ദേശീയ പൗരത്വ രജിസ്റ്ററിനുമെതിരെ നടക്കുന്ന പ്രതിഷേധത്തിനിടയിലാണ് നോട്ടീസ്. ഹൈദരാബാദില്‍ കഴിഞ്ഞ 40 വര്‍ഷമായി ജീവിക്കുന്നയാളാണ് നോട്ടീസ് ലഭിച്ചവരില്‍ ഒരാളായ സത്താര്‍. റേഷന്‍ കാര്‍ഡും തെരഞ്ഞെടുപ്പ് തിരിച്ചറിയല്‍ കാര്‍ഡുമുണ്ട്. പൊതുമേഖലാ സ്ഥാപനത്തിലാണ് സത്താറിന്റെ പിതാവ് ജോലിചെയ്തിരുന്നത്. യുഐഡിഎഐക്ക് ഇന്ത്യന്‍ പൗരനെ വിളിച്ചുവരുത്തി പൗരത്വം ചോദ്യം ചെയ്യാന്‍ അധികാരമുണ്ടോയെന്ന് വ്യക്തമാക്കണമെന്നാവശ്യപ്പെട്ട് തെലങ്കാന ഹൈക്കോടതിയില്‍ ഹര്‍ജി നല്‍കുമെന്ന് അദ്ദേഹം പറഞ്ഞു.
അതേസമയം സംഭവം വിവാദമായതോടെ വിശദീകരണവുമായി അധികൃതര്‍ രംഗത്തെത്തി. വ്യാജ ആധാര്‍ കാര്‍ഡുകളെക്കുറിച്ച് തെലങ്കാന പോലീസ് നല്‍കിയ വിവരത്തിന്റെ അടിസ്ഥാനത്തിലാണ് ആളുകള്‍ക്ക് നോട്ടീസ് അയച്ചതെന്നാണ് യുഐഡിഎഐ വാദം. അനധികൃത കുടിയേറ്റക്കാര്‍ക്ക് ആധാര്‍ കാര്‍ഡ് ലഭിക്കുന്നതിനുള്ള യോഗ്യതയില്ല. പ്രാഥമികാ അന്വേഷണത്തില്‍ ഇക്കാര്യം കണ്ടെത്തിയതുകൊണ്ടാണ് നോട്ടീസ് അയച്ചതെന്നും യുഐഡിഎഐ വ്യക്തമാക്കി.