ബിഹാറിന് പിന്നാലെ തമിഴ്‌നാട് നിയമസഭയും ദേശീയ പൗര റജിസ്റ്ററിനെതിരെ (എന്‍ആര്‍സി) പ്രമേയം പാസാക്കാനൊരുങ്ങുന്നു. എന്‍ആര്‍സിക്കെതിരെ നിയമസഭയില്‍ പ്രമേയം പാസാക്കുന്നതു സജീവ പരിഗണനയിലുണ്ടെന്നു മുഖ്യമന്ത്രി എടപ്പാടി കെ.പളനി സാമി പറഞ്ഞു. പൗരത്വ നിയമം, ദേശീയ ജനസംഖ്യാ റജിസ്റ്റര്‍, പൗര റജിസ്റ്റര്‍ എന്നിവയ്‌ക്കെതിരെ നിയമസഭ പ്രമേയം പാസാക്കണമെന്നാവശ്യപ്പെട്ടു തമിഴ്‌നാടിന്റെ വിവിധ ഭാഗങ്ങളില്‍ പ്രതിഷേധം തുടരുകയാണ്. അടുത്ത മാസം ഒമ്പതിനാണു നിയമസഭാ സമ്മേളനം ആരംഭിക്കുന്നത്.
ദേശീയ പൗരത്വ രജിസ്റ്റര്‍ നടപ്പാക്കില്ലെന്ന് കാണിച്ച് ബിഹാര്‍ നിയമസഭ പ്രമേയം പാസാക്കിയിരുന്നു. എന്നാല്‍ ദേശീയ ജനസംഖ്യ രജിസ്റ്റര്‍ ഭേദഗതികളോടെ നടപ്പാക്കുമെന്ന് കാണിച്ച് മറ്റൊരു പ്രമേയവും നിയമസഭ പാസാക്കിയിട്ടുണ്ട്. ദേശീയ ജനസംഖ്യ രജിസ്റ്ററുമായി ബന്ധപ്പെട്ട് ജനങ്ങളില്‍ നിന്ന് തേടുന്ന വിവരങ്ങളില്‍ ചിലതിനെതിരെ വിമര്‍ശനം ഉയര്‍ന്നിരുന്നു. ഇത്തരം വിവാദപരമായ ചോദ്യങ്ങള്‍ ഒഴിവാക്കി തരണമെന്ന് ആവശ്യപ്പെട്ട് കേന്ദ്രത്തിന് കത്ത് നല്‍കിയതായി ബിഹാര്‍ മുഖ്യമന്ത്രി നിതീഷ് കുമാര്‍ സഭയില്‍ പറഞ്ഞിരുന്നു.
