മുംബൈ; സുശാന്ത് സിങ് രാജ്പുത്തിന്റെ മരണം ബോളിവുഡില്‍ വിവാദങ്ങള്‍ സൃഷ്ടിക്കുന്നു. മരണവുമായി ബന്ധപ്പെട്ട് നിര്‍മാണ കമ്പനിയായ ‘യഷ്‌രാജ്’ ഫിലിംസ് അധികൃതരെ അടുത്ത ദിവസങ്ങളില്‍ ചോദ്യം ചെയ്യുമെന്നാണ് റി്‌പ്പോര്‍ട്ട്. സിനിമാ കരാറുകളുടെ കൂടുതല്‍ രേഖകള്‍ പൊലീസിന്റെ ആവശ്യപ്രകാരം ഇവര്‍ കൈമാറിയിരുന്നു. പ്രമുഖരുടെ ലോബി നടനെ ഒതുക്കാന്‍ ശ്രമിച്ചെന്ന ആരോപണങ്ങളുടെ പശ്ചാത്തലത്തിലാണ് അന്വേഷണം ഈ ദിശയില്‍ മുന്നേറുന്നത്.
‘യഷ്‌രാജു’മായുള്ള കരാറുകളില്‍ നിന്നു പിന്‍മാറിയ സുശാന്ത് അവരുടെ ചിത്രങ്ങളില്‍ അഭിനയിക്കരുതെന്നു തന്നോടു പറഞ്ഞതായി അടുത്ത സുഹൃത്തായ നടി റിയ ചക്രവര്‍ത്തി പൊലീസിനോട് വെളിപ്പെടുത്തിയിരുന്നു. റിയ ഉള്‍പ്പെടെ 15 പേരെയാണ് ഇതുവരെ ചോദ്യം ചെയ്തത്. മൊഴിയിലെ വിവരങ്ങള്‍ അന്വേഷണ സംഘം പരിശോധിക്കുകയാണ്.
നേരത്തെ, സുശാന്തുമായി പ്രണയത്തിലായിരുന്നുവെന്നും പിന്നീട് പിണങ്ങി വീടുവിട്ടുവെന്നും റിയ മൊഴി നല്‍കിയിരുന്നു. അതേസമയം, റിയയുടെ വിവാഹം ഉറപ്പിച്ചതിനു ശേഷമാണ് വിഷാദരോഗത്തിനടിമയായതെന്നും പറയപ്പെടുന്നു.
