ന്യൂഡല്‍ഹി: ലഡാക്കില്‍ ഇരുപത് സൈനികരുടെ വീരമൃത്യുവിന് കാരണമായ സംഘര്‍ഷത്തില്‍ പ്രധാനമന്ത്രി എന്തു കൊണ്ടാണ് പ്രതികരിക്കാതിരിക്കുന്നതെന്ന് കോണ്‍ഗ്രസ് നേതാവ് രാഹുല്‍ഗാന്ധി. എന്താണ് പ്രധാനമന്ത്രി മറച്ചു വയ്ക്കാന്‍ ശ്രമിക്കുന്നതെന്നും രാഹുല്‍ ഗാന്ധി ചോദിച്ചു.
മോദി എന്തുകൊണ്ടാണ് പ്രതികരിക്കാത്തത്? എന്താണ് സംഭവിച്ചതെന്ന് എല്ലാവര്‍ക്കും അറിയണം. ഇന്ത്യയുടെ സൈനികരെ കൊലപ്പെടുത്താനും രാജ്യത്തിന്റെ മണ്ണ് കൈയ്യേറാനും ചൈനക്കെങ്ങനെ ധൈര്യം വന്നുവെന്നും രാഹുല്‍ ട്വിറ്ററില്‍ കുറിച്ചു.
തിങ്കളാഴ്ച രാത്രി കിഴക്കന്‍ ലഡാക്കിലുണ്ടായ സംഘ!ര്‍ഷത്തില്‍ ഇരുപത് ഇന്ത്യന്‍ സൈനികര്‍ കൊല്ലപ്പെട്ടതായി ഇന്നലെയാണ് കരസേന അറിയിച്ചത്. ചൈനീസ് നിരയിലും കനത്ത ആള്‍നാശമുണ്ടായി എന്നാണ് വിവരം. അതിര്‍ത്തി ഭേദിച്ച് ചൈനീസ് സൈന്യം ഇന്ത്യന്‍ പ്രദേശത്തേക്ക് കേറിയതോടെയാണ് ഇന്ത്യന്‍ സൈന്യവും ഇവിടേക്ക് എത്തിയത്.
