കരള്‍ രോഗം മൂര്‍ഛിച്ചിട്ടും മദ്യപാനം; ജിതേഷ് കക്കിടിപ്പുറത്തിന്റെ മരണത്തെ കുറിച്ച് പൊലീസ്

മലപ്പുറം: നാടന്‍പാട്ട് കലാകാരന്‍ ജിതേഷ് കക്കിടിപ്പുറത്തിന്റെ മരണത്തെ കുറിച്ച് പൊലീസ്. മരണ കാരണം ഡോക്ടറുടെ നിര്‍ദ്ദേശം ലംഘിച്ച് മദ്യപിച്ചതു കൊണ്ടാണെന്ന് പൊലീസ് പറഞ്ഞു. ലിവര്‍ സിറോസിസ് (കരള്‍ രോഗം) ബാധിച്ച് ചികിത്സയിലായിരുന്ന ജിതേഷിനോട് ഇനി ഒരിക്കലും മദ്യപിക്കരുതെന്നും, ഉപ്പുപോലും കഴിക്കരുതെന്നും പരിശോധന നടത്തുന്ന തൃശൂര്‍ മെഡിക്കല്‍ കോളജ് ആശുപത്രിയിലെ ഡോക്ടര്‍ പ്രവീണ്‍ നിര്‍ദ്ദേശിച്ചിരുന്നു. എന്നാല്‍ ജിതേഷ് ഡോക്ടറുടെ നിര്‍ദ്ദേശം മറികടന്ന് വീണ്ടും മദ്യപിച്ചതോടെയാണ് മരണം സംഭവിച്ചതെന്നാണ് പൊലീസിന് തുടരന്വേഷണത്തില്‍ വ്യക്തമായി.

രക്തം ഛര്‍ദിച്ച നിലയിലാണ് ഇന്നലെ ജിതേഷിനെ ചങ്ങരംകുളത്തെ വീടിന്റെ പൂമുഖത്ത് മരിച്ചനിലയില്‍ കണ്ടെത്തിയത്. അയല്‍വാസിയും ലോട്ടറി വില്‍പ്പനക്കാരനുമായ കൃഷ്ണന്‍ വീട്ടില്‍ എത്തിയപ്പോഴാണ് പൂമുഖത്ത് വായയില്‍ നിന്ന് ചോരയൊലിച്ച നിലയില്‍ ജിതേഷ് കിടക്കുന്നത് കണ്ടത്. ഉടന്‍ നാട്ടുകാരെയും ബന്ധുക്കളെയും വിവരം അറിയിച്ചു. ചങ്ങരംകുളത്തെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. കക്കിടിപ്പുറം ജിതേഷ് ഒരാഴ്ച മുന്‍പ് ഗുരുവായൂരില്‍ പാട്ടെഴുതാന്‍ പോയിരുന്നു. തുടര്‍ന്ന് വെള്ളിയാഴ്ച രാത്രി വീട്ടില്‍ തിരിച്ചെത്തിയതായി ബന്ധുക്കള്‍ പറഞ്ഞു. പെയിന്റിങ് തൊഴിലാളി കൂടിയായ ജിതേഷ് സഹോദരി അമ്മിണിക്കൊപ്പമാണ് കക്കിടിപ്പുറത്തെ വീട്ടില്‍ താമസിക്കുന്നത്. അമ്മിണി ഭര്‍ത്തൃവീട്ടിലേക്ക് പോയിരുന്നതിനാല്‍ വീട്ടില്‍ മറ്റാരുമുണ്ടായിരുന്നില്ല. കരള്‍ സംബന്ധമായ അസുഖത്തെ തുടര്‍ന്ന് ആറു മാസമായി ജിതേഷ് തൃശൂര്‍ മെഡിക്കല്‍ കോളേജിലെ ഡോക്ടര്‍ പ്രവീണിന്റെ ചികിത്സയിലായിരുന്നു.

ചടങ്ങരംകുളം എസ്‌ഐ ഹരിഹര സുനവും സംഘവും സ്ഥലത്തെത്തി പരിശോധന നടത്തുകയും ഇന്‍ക്വസ്റ്റ് നടപടികള്‍ പൂര്‍ത്തിയാക്കുകയും ചെയ്തു. ചങ്ങരംകുളത്തെ സ്വകാര്യ ആശുപത്രിയിലെ മോര്‍ച്ചറിയില്‍ സൂക്ഷിച്ച മൃതദേഹം കോവിഡ് പരിശോധനയ്ക്കുശേഷം ബന്ധുക്കള്‍ക്ക് വിട്ടുനല്‍കും. ഇനി ജിതേഷ് മദ്യപിച്ചാല്‍ രക്തം ഛര്‍ദിക്കുന്നതോടൊപ്പം ശരീരത്തിലെ ഞരമ്പുകള്‍ പൊട്ടുകയും ചെയ്യുമെന്ന് നേരത്തെ ഡോക്ടര്‍
നിര്‍ദ്ദേശിച്ചിരുന്നതായി പോലീസ് പറഞ്ഞു.

SHARE