ബഹുസ്വരതയുടെ വര്‍ണങ്ങളില്‍ പ്രതിരോധത്തിന്റെ ചിത്രങ്ങള്‍; വരക്കൂട്ടം ദ്വിദിന വരക്യാമ്പ് സമാപിച്ചു

നിലമ്പൂര്‍: നിറങ്ങളില്‍ കാടുനിറഞ്ഞു. കാടിന്റെ നിഗൂഢസൗന്ദര്യവും വന്യതയും ക്യാന്‍വാസുകളിലേക്ക് പടര്‍ന്നു. നിലമ്പൂര്‍ തേക്കുകാട്ടില്‍ നടന്ന ചിത്രകലാ ക്യാമ്പില്‍ കാടും മരങ്ങളും പ്രകൃതിയും മനുഷ്യജീവിതത്തിന്റെ താളമുള്ള ചിത്രങ്ങളായി. മലപ്പുറം കേന്ദ്രമായി പ്രവര്‍ത്തിക്കുന്ന കലാകാരന്മാരുടെയും കലാ ആസ്വാദകരുടെയും കൂട്ടായ്മയായ വരക്കൂട്ടമാണ് നിറങ്ങള്‍ കൊണ്ട് സംവദിച്ചും വരകൊണ്ട് പ്രതിരോധ വഴിയകള്‍ കണ്ടെടുത്തും കാട്ടില്‍ ഒത്തുകൂടിയത്. കലാകാരന്‍മാര്‍ക്കെതിരെ ഉയരുന്ന ഫാസിസ്റ്റ് നിലപാടുകളില്‍ പ്രതിഷേധിച്ചും കലയിലെ സമകാലിക ഇടപെടലുകളെ അടുത്തറിയാനുമാണ് ബഹുസ്വരതയുടെ വര്‍ണങ്ങളുമായി കലാകാരന്‍മാര്‍ കൂടിയിരുന്ന് വരച്ചത്.

ചിത്രകാരന്‍ അശാന്തന്റെ മരണത്തില്‍ അനുശോചിച്ചും അദ്ദേഹത്തിന്റെ മൃതദേഹത്തോട് ഫാസിസ്റ്റുമനസ്സുകള്‍ കാണിച്ച അവഹേളനത്തില്‍ പ്രതിഷേധിച്ചുമാണ് ക്യാമ്പ് തുടങ്ങിയത്. കലാകാരന്‍മാര്‍ സ്വതന്ത്രമായ ആവിഷ്‌കാരങ്ങള്‍ നടത്താന്‍ കാടുകയറേണ്ട ഗതികെട്ടകാലമാണിതെന്ന് ചിത്രകാരന്‍മാര്‍ പറഞ്ഞു.

യൂനുസ് മുസ്‌ലിയാരകത്ത്, കെ എം നാരായണന്‍, മുഖ്താര്‍ ഉദരംപൊയില്‍, സതീഷ് ചളിപ്പാടം, പി ജി ശ്രീനിവാസന്‍, രതീഷ് കുമാര്‍, ഉസ്മാന്‍ ഇരുമ്പുഴി, സുരേഷ് ചാലിയത്ത്, ഐഷ യൂനുസ്, ഷബീബ മലപ്പുറം, ഉഷ മഞ്ചേരി, ശംസി ജാസ്മിന്‍, സേതു മക്കരപ്പറമ്പ്, ദിനേശ് മഞ്ചേരി, ശിഹാബ് മമ്പാട്, അനീഷ് കവളമുക്കട്ട തുടങ്ങി ജില്ലക്കകത്തും പുറത്തുനിന്നുമായി തെരഞ്ഞെടുത്ത 20 ചിത്രകാരന്മാരാണ് നിലമ്പൂര്‍ കനോലി പ്ലോട്ടിലും താണയിലെ സ്പ്രിങ്‌സ് സ്‌കൂളിലുമായി നടന്ന ദ്വിദിനവരക്യാമ്പില്‍ പങ്കെടുത്തത്. അക്രലിക് കളറില്‍ ക്യാന്‍വാസിലായിരുന്നു വര.

പി വി അന്‍വര്‍ എം എല്‍ എ ക്യാമ്പ് ഉദ്ഘാടനം ചെയ്തു. റിഞ്ചു വെള്ളിലയാണ് ക്യൂറേറ്റര്‍. ഷമീം സീഗള്‍, അനീസ് വടക്കന്‍ തുടങ്ങിയവര്‍ ക്യാമ്പിന് നേതൃത്വം നല്‍കി.

നിലമ്പൂര്‍ തേക്കുകാട്ടില്‍ വരക്കൂട്ടം സംഘടിപ്പിച്ച ദ്വിദിന വരക്യാമ്പില്‍ നിന്ന്

 

 

SHARE