രാജ്യത്തെ പത്ത് നഗരങ്ങളില്‍ മാത്രം അരലക്ഷം കോവിഡ് ബാധിതര്‍

രാജ്യത്തുള്ള 81,970 കോവിഡ് ബാധിതരില്‍ അരലക്ഷം പേരും രാജ്യത്തെ പത്ത് നഗരങ്ങളിലുള്ളവര്‍. മുംബൈ, ഡല്‍ഹി, അഹമ്മദാബാദ്, ചെന്നൈ, പൂനെ, താനെ, ഇന്‍ഡോര്‍, ജയ്പൂര്‍, കൊല്‍ക്കത്ത, സൂറത്ത് എന്നിവയാണ് പത്ത് നഗരങ്ങള്‍. ഇവിടെ മാത്രം ഇതുവരെ 50,107 പേര്‍ക്കാണ് വൈറസ് ബാധ സ്ഥിരികരിച്ചത്.

മുംബൈയില്‍ മാത്രം 16,738 പേര്‍ക്കാണ് ഇതുവരെ കോവിഡ് സ്ഥിരീകരിച്ചത്. രാജ്യത്ത് ഏറ്റവും കൂടുതല്‍ പേര്‍ക്ക് രോഗബാധ സ്ഥിരീകരിച്ച സംസ്ഥാനം മഹാരാഷ്ട്രയാണ്. മൂംബൈയെ കൂടാതെ മഹാരാഷ്ട്രയിലെ മറ്റ് നഗരങ്ങളായ പൂനെയും താനെയും അഞ്ചും ആറും സ്ഥാനങ്ങളില്‍. പൂനെയില്‍ 3314 പേര്‍ക്കും താനെയില്‍ 3287 പേര്‍ക്കുമാണ് വൈറസ് ബാധ സ്ഥിരീകരിച്ചത്.

ഡല്‍ഹിയാണ് കോവിഡ് ബാധിതര്‍ കുടുതലുള്ള രണ്ടാമത്തെ നഗരം. അവിടെമാത്രം 8470 രോഗബാധിതരാണുള്ളത്. മൂന്നാമത് അഹമ്മദാബാദാണ്. അവിടെ 6910 പേര്‍ക്കാണ് കോവിഡ്. ഗുജറാത്തിലെ തന്നെ മറ്റ് പ്രധാന നഗരമായ സൂറത്താണ് പത്താം സ്ഥാനത്ത്. 983 കേസുകളാണ് ഇതുവരെ സ്ഥിരികരിച്ചത്.

നാലാമത് ചെന്നൈയാണ്. ചെന്നൈയില്‍ മാത്രം 5637 കേസുകളാണ് ഇതുവരെ റിപ്പോര്‍ട്ട് ചെയതത്. ഏഴാമത് ഇന്‍ഡോറാണ്. അവിടെ 2238 പേരാണ് രോഗബാധിതര്‍. എട്ടും ഒന്‍പതും സ്ഥാനങ്ങളില്‍ ജയ്പൂരും കൊല്‍ക്കത്തയുമാണ്. ജയ്പൂരില്‍ 1373 പേരും കൊല്‍ക്കത്തയില്‍ 1157 പേര്‍ക്കുമാണ് കോവിഡ് സ്ഥിരീകരിച്ചത്.

SHARE