മൂന്നര മണിക്കൂര്‍ കൊണ്ട് കൊച്ചി-കോഴിക്കോട് യാത്ര

• അതിവേഗ ജലയാനം റെഡി

• അടുത്ത മാസം പരീക്ഷണ ഓട്ടം

കോഴിക്കോട്: കൊച്ചി -കോഴിക്കോട് അതിവേഗ ജലയാനം സര്‍വീസിനുള്ള കാത്തിരിപ്പിന് അറുതിയാവുന്നു. മാസങ്ങള്‍ക്ക് മുമ്പെ സര്‍വ്വീസ് നടത്താന്‍ തീരുമാനിച്ചെങ്കിലും സാങ്കേതിക കുരുക്കില്‍ പെടുകയായിരുന്നു. കൊച്ചി പോര്‍ട്ട് ട്രസ്റ്റും സംസ്ഥാന തുറമുഖ വകുപ്പും കഴിഞ്ഞ ജൂലൈയില്‍ എത്തിച്ച ജലയാനങ്ങള്‍ ഓണത്തിന് സര്‍വിസ് തുടങ്ങുമെന്നാണ് പ്രഖ്യാപിച്ചിരുന്നത്. വാണിജ്യാടിസ്ഥാനത്തില്‍ സര്‍വിസ് നടത്താന്‍ മര്‍ക്കന്റയില്‍ മറൈന്‍ ഡിപാര്‍ട്ട്‌മെന്റിന്റെ അനുമതി ആവശ്യമാണ്. ഇതിനുള്ള നടപടികള്‍ നീണ്ടതാണ് തിരിച്ചടിയായത്.

എന്നാല്‍, മര്‍ക്കന്റയില്‍ മറൈന്‍ ഡിപാര്‍ട്ട്‌മെന്റിന്റെ അനുമതി ലഭിച്ച് അടുത്ത മാസം പരീക്ഷണ ഓട്ടം ആരംഭിക്കാനാവുമെന്നാണ് പ്രതീക്ഷയെന്ന് അധികൃതര്‍ പറയുന്നു. റഷ്യയില്‍ നിന്നുള്ള ചീഫ് എന്‍ജിനീയറുടെയും ക്യാപ്റ്റന്റെയും കീഴിലായിരിക്കും പരീക്ഷണ ഓട്ടം. കഴിഞ്ഞ യു.ഡി.എഫ് സര്‍ക്കാറിന്റെ സ്വപ്‌ന പദ്ധതികളിലൊന്നായിരുന്നു രാജ്യത്തെ ആദ്യ അതിവേഗ ജലയാനം സര്‍വ്വീസായ കൊച്ചി-കോഴിക്കോട് യാത്ര. കോഴിക്കോട് മോണോ റെയില്‍ പ്രവൃത്തി ഉദ്ഘാടനം നിര്‍വ്വഹിച്ച് മുഖ്യമന്ത്രി ഉമ്മന്‍ചാണ്ടി ജൂലൈ മുതല്‍ കൊച്ചി-കോഴിക്കോട് അതിവേഗ ജലയാനം സര്‍വ്വീസ് ആരംഭിക്കുമെന്ന് പ്രഖ്യാപിച്ചിരുന്നു.

ഡിസംബര്‍ മുതല്‍ സര്‍വീസ് ആരംഭിക്കാനാണ് ഇപ്പോഴത്തെ നീക്കം. കരമാര്‍ഗമുള്ള യാത്രയേക്കാള്‍ നേരത്തേ എത്തുമെന്നതും കൂടിയ സൗകര്യങ്ങളും ഉല്ലാസ യാത്രയുടെ പ്രതീതിയും യാത്രക്കാരെ ആകര്‍ഷിക്കും. മൂന്നര മണിക്കൂര്‍ കൊണ്ട് കടലിലൂടെ കൊച്ചി-കോഴിക്കോട് സര്‍വ്വീസ് നടത്തുന്നത് ഉല്ലാസവും സമയ ലാഭവും സാധ്യമാക്കും. ഒരാള്‍ക്ക് ആയിരം രൂപയോളമാകും യാത്രക്കൂലി. ആളൊന്നിന് കിലോമീറ്ററിന് ഒരുരൂപ വീതം സംസ്ഥാന സര്‍ക്കാര്‍ സബ്‌സിഡി നല്‍കുമെന്നാണ് വാഗ്ദാനം.

പ്രവാസികളുടെ മുതല്‍ മുടക്കില്‍ 130 പേര്‍ക്കിരിക്കാവുന്ന രണ്ട് ജലയാനങ്ങളാണ് ഇതിനായി എറണാകുളം വാര്‍ഫില്‍ എത്തിച്ചിട്ടുള്ളത്. 50 കോടി വീതം ചെലവിട്ട് റഷ്യന്‍ സഹകരണത്തോടെ ഗ്രീസിലെ ഏഥന്‍സില്‍നിന്ന് ഇറക്കുമതി ചെയ്തതാണ് ജലയാനങ്ങള്‍. സാധാരണ ബോട്ടുകളില്‍നിന്ന് വ്യത്യസ്തമായി കൂടിയ സുരക്ഷയും വേഗം കൂടിയ എഞ്ചിനുകളുമാണ് ഉപയോഗിക്കുന്നത്. കീഴ്ഭാഗത്ത് ഉറപ്പിച്ച ചിറകുകളില്‍ ഉയര്‍ന്ന് നില്‍ക്കുന്ന യാനത്തിന്റെ ചിറകുകള്‍ വെള്ളത്തിനടിയിലും ശേഷിച്ചഭാഗം മുകളിലുമായിരിക്കും. എ.സി അടക്കം മികച്ച സൗകര്യങ്ങളും ഉറപ്പാക്കിയിട്ടുണ്ട്. തീരത്തുനിന്ന് 12 കിലോമീറ്റര്‍ മാറിയാണ് ബോട്ടിന്റെ യാത്ര. മണിക്കൂറില്‍ 75 കി.മീ വരെ ദൂരം ബോട്ടുകള്‍ക്ക് പോകാന്‍ കഴിയും.

കൊച്ചി-ബേപ്പൂര്‍ സര്‍വീസ് ആരംഭിച്ചശേഷം വിഴിഞ്ഞത്തേക്ക് സര്‍വിസ് തുടങ്ങാനും വിദേശ മലയാളികളുടെ കമ്പനിയായ സേഫ് ബോട്ട്‌സ് ട്രിപ്പിന് പരിപാടിയുണ്ട്. ജലയാന സര്‍വിസ് നടത്താന്‍ നേരത്തേതന്നെ ധാരണാപത്രത്തില്‍ തുറമുഖ വകുപ്പും സേഫ് ബോട്ട് ട്രിപ്‌സ് അധികൃതരും ഒപ്പുവെച്ചിരുന്നു. കരഗതാഗതം ചെലവേറിയതും തിരക്കേറിയതുമാണ്. സമാന്തര പരീക്ഷണമായാണ് ജലഗതാഗതം ഉപയോഗപ്പെടുത്തുന്നത്. കൊച്ചി-കോഴിക്കോട് ജലയാനം ലാഭകരമായാല്‍ കൂടുതല്‍ സര്‍വീസുകളും വരും. അടുത്ത ഘട്ടത്തില്‍ കൊച്ചി-തിരുവനന്തപുരം സര്‍വീസാണ് പരിഗണനയിലുള്ളത്.

SHARE