തിരുവനന്തപുരം: സംസ്ഥാനത്ത് നാളെ മുതല്‍ അന്തര്‍ജില്ലാ ബസ് സര്‍വീസുകള്‍ തുടങ്ങാന്‍ തീരുമാനം. മുഖ്യമന്ത്രി അധ്യക്ഷനായ ഉന്നതതല യോഗത്തിലാണ് സംസ്ഥാനത്തിനകത്ത് പൊതുഗതാഗതത്തിന് അനുമതി നല്‍കാന്‍ തീരുമാനം. അന്തര്‍സംസ്ഥാന ബസ് സര്‍വീസുകള്‍ ഉടന്‍ ആരംഭിക്കേണ്ടെന്ന് യോഗം തീരുമാനമെടുത്തു.
നിലവില്‍ കെഎസ്ആര്‍ടിസി, സ്വകാര്യ ബസുകള്‍ ജില്ലകള്‍ക്കുള്ളില്‍ സര്‍വീസ് നടത്തുന്നുണ്ട്. ഈ സര്‍വീസുകള്‍ക്ക് സ്വീകരിക്കുന്ന സുരക്ഷാ മാനദണ്ഡങ്ങളോടെയായിരിക്കും അന്തര്‍ജില്ലാ ബസ് സര്‍വീസുകളും നടത്തുക. പകുതി സീറ്റുകളില്‍ മാത്രമേ യാത്രക്കാരെ അനുവദിക്കൂ. യാത്രക്കാര്‍ നിര്‍ബന്ധമായും മാസ്‌ക് ധരിക്കുകയും ചെയ്യണം. ടിക്കറ്റ് നിരക്കില്‍ 50 ശതമാനം നിരക്കു വര്‍ധനയുമുണ്ടാകുമെന്നാണ് റിപ്പോര്‍ട്ടുകള്‍. കേന്ദ്രസര്‍ക്കാര്‍ അന്തര്‍സംസ്ഥാന ബസ് സര്‍വീസുകള്‍ ആരംഭിക്കാന്‍ അനുമതി നല്‍കിയിട്ടുണ്ടെങ്കിലും തത്കാലം വേണ്ടെന്നാണ് സംസ്ഥാന സര്‍ക്കാര്‍ നിലപാട്. തമിഴ്‌നാട് അടക്കമുള്ള സംസ്ഥാനങ്ങളില്‍ രോഗബാധ തുടരുന്ന പശ്ചാത്തലത്തിലാണ് തീരുമാനം.
അതേസമയം, ലോക്ക്ഡൗണ്‍ കാലത്ത് അടച്ചിട്ട ഹോട്ടലുകളും ആരാധനാലയങ്ങളും തുറക്കുന്നതു സംബന്ധിച്ചും സര്‍ക്കാര്‍ ഇന്നു തീരുമാനമെടുത്തേക്കും. നിയന്ത്രണങ്ങളോടെ ഭക്ഷണശാലകള്‍ക്ക് പ്രവര്‍ത്തനാനുമതി നല്‍കാനാണ് തീരുമാനമെന്നാണ് റിപ്പോര്‍ട്ടുകള്‍. മേശകളുടെ അകലം വര്‍ധിപ്പിച്ചും പകുതി കസേരകളില്‍ മാത്രം പ്രവേശനം അനുവദിച്ചുമായിരിക്കും ഹോട്ടലുകള്‍ക്ക് പ്രവര്‍ത്തനാനുമതി നല്‍കുക. മുന്‍കൂട്ടി ടേബിളുകള്‍ ബുക്ക് ചെയ്യുന്നതും നിര്‍ബന്ധമാക്കിയേക്കും.
