കൊല്‍ക്കത്ത: കോവിഡിനിടെ രോഗപ്രതിരോധ ശേഷി വര്‍ധിപ്പിക്കുന്ന ‘സന്ദേഷ്’ പുറത്തിറക്കാന്‍ ബംഗാള്‍ സര്‍ക്കാരിന്റെ തീരുമാനം. സുന്ദര്‍ബന്‍സില്‍ നിന്നുള്ള തേന്‍ അടങ്ങിയിട്ടുള്ള ഈ മധുര പലഹാരം പ്രതിരോധ ശേഷി വര്‍ധിപ്പിക്കുമെങ്കിലും കോവിഡിനുള്ള മറുമരുന്ന് അല്ലെന്ന് അധികൃതര്‍ വ്യക്തമാക്കി.
പശുവിന്‍ പാലില്‍ നിന്ന് ഉണ്ടാക്കുന്ന ചീസും സുന്ദര്‍ബന്‍സില്‍ നിന്നുള്ള ശുദ്ധമായ തേനും ചേര്‍ത്ത് തയ്യാറാക്കുന്ന ഇതില്‍ കൃത്രിമ സുഗന്ധങ്ങളൊന്നും ചേര്‍ക്കില്ലെന്ന് ബന്ധപ്പെട്ട ഉദ്യോഗസ്ഥന്‍ പറഞ്ഞു. രണ്ടു മാസത്തിനകം സന്ദേഷ് വിപണിയിലെത്തും. നഗരത്തിലും സമീപ ജില്ലകളിലും ലഭ്യമാകും.പലഹാരം നിര്‍മ്മിക്കുന്നതിനുള്ള തേന്‍ പിര്‍ഖാലി, ജാര്‍ഖാലി, സുന്ദര്‍ബന്‍ തുടങ്ങിയ സ്ഥലങ്ങളില്‍ നിന്ന് ശേഖരിക്കുമെന്നും അത് ശാസ്ത്രീയമായി സംഭരിക്കുമെന്നും മന്ത്രി മന്തുരം പഖിറ പറഞ്ഞു.
