യു.എ.ഇയിലെ ഇന്ത്യക്കാരുടെ സുരക്ഷ ഉറപ്പുവരുത്തുന്നതിന് നന്ദി അറിയിച്ചും മുസ്ലിംലീഗിന്റെ പ്രവാസി ഘടകമായ കെ.എം.സി.സിയുടെ പിന്തുണയും സഹകരണവും എപ്പോഴുമുണ്ടാകുമെന്ന് ഉറപ്പു നല്‍കിയും ദുബൈ അധികാരികള്‍ക്ക് ഇന്ന് പ്രത്യേകം കത്തയച്ചു. ദുബൈ ഹെല്‍ത്ത് അതോറിറ്റി ഡയരക്ടര്‍ ജനറല്‍ ഹുമൈദ് അല്‍ഖിതാമി, ദുബൈ പോലീസ് മേധാവി ലെഫ്. ജനറല്‍ അബ്ദുള്ള ഖലീഫ അല്‍മര്‍റി, ദുബൈ സ്റ്റേറ്റ് സെക്യൂരിറ്റി ഡിപ്പാര്‍ട്മെന്റ് ഡയരക്ടര്‍ ജനറല്‍ തലാല്‍ ഹുമൈദ് ബെല്‍ഹൂല്‍, ദുബൈ ഭരണാധികാരി ശൈഖ് മുഹമ്മദ് ബിന്‍ റാഷിദ് അല്‍മഖ്തൂമിന്റെ സാബീല്‍ പാലസ് ഡയരക്ടര്‍ ഹാരിബ് ബിന്‍ സുബൈഹ് എന്നിവര്‍ക്കാണ് കത്തയച്ചത്.
സ്വദേശികളുടെയും വിദേശികളുടെയും ആരോഗ്യവും സുരക്ഷയും മുന്‍നിര്‍ത്തി യു.എ.ഇ ഗവണ്‍മെന്റ് ചെയ്തുകൊണ്ടിരിക്കുന്ന വിശിഷ്ട സേവനങ്ങളില്‍ സന്തുഷ്ടി അറിയിച്ചു. ദുബൈ ഭരണകൂടവും ആരോഗ്യ മന്ത്രാലയും നടത്തുന്ന കോവിഡ് പ്രതിരോധ പ്രവര്‍ത്തനങ്ങളെ അങ്ങേയറ്റം വിലമതിക്കുന്നതായും എല്ലാ ആരോഗ്യ, സുരക്ഷാ പ്രവര്‍ത്തനങ്ങളോടും സഹകരിക്കാന്‍ കെ.എം.സി.സി തയ്യാറാണെന്നും കത്തില്‍ സൂചിപ്പിച്ചു.
കെ.എം.സി.സിയുടെ മാതൃസംഘടനയായ ഇന്ത്യന്‍ യൂണിയന്‍ മുസ്ലിംലീഗിന്റെ സംസ്ഥാന പ്രസിഡന്റ് എന്ന നിലയില്‍ കെ.എം.സി.സിയുടെ ഓരോ അംഗവും നടത്തുന്ന എല്ലാ പ്രവര്‍ത്തനങ്ങള്‍ക്കും അഭിമാനപൂര്‍വ്വം എല്ലാ പിന്തുണയും സഹകരണവും നല്‍കുമെന്ന് കത്തില്‍ അറിയിച്ചു. ദുബൈയിലെ പ്രവാസി താമസ കേന്ദ്രങ്ങളില്‍ രാവും പകലും ഓടിനടന്ന് കെ.എം.സി.സി പ്രവര്‍ത്തകര്‍ സന്നദ്ധപ്രവര്‍ത്തനം നടത്തിക്കൊണ്ടിരിക്കുകയാണ്. അവരില്‍നിന്ന് ആവശ്യമായ ഏതു സഹായവും ഗവണ്‍മെന്റിന് ഉണ്ടാകുമെന്നും ഉറപ്പു നല്‍കി.
- സയ്യിദ് ഹൈദരലി ശിഹാബ് തങ്ങള്‍, പാണക്കാട്
