പെട്രോള്‍,ഡീസല്‍ വില തുടര്‍ച്ചയായ ഏഴാം ദിവസവും കൂട്ടി

ന്യൂഡല്‍ഹി: രാജ്യത്ത് തുടര്‍ച്ചയായ ഏഴാം ദിവസവും ഇന്ധനവില കൂട്ടി എണ്ണക്കമ്പനികള്‍. പെട്രോളിന് ഇന്ന് 59 പൈസയും ഡീസലിന് 55 പൈസയുമാണ് കൂട്ടിയത്. കഴിഞ്ഞ ഒരാഴ്ചയ്ക്കിടെ പെട്രോളിന് കൂടിയത് 3.91 രൂപയാണ്. ഡീസലിന് 3.81 രൂപയും. ഏതാണ്ട് നാല് രൂപയോളം ഒരാഴ്ചയ്ക്കകം ഇന്ത്യയില്‍ കൂടുമ്പോഴും അന്താരാഷ്ട്ര വിപണിയില്‍ ക്രൂഡ് ഓയിലിന്റെ വില താഴ്ന്ന് തന്നെയാണെന്നതാണ് ശ്രദ്ധേയം. ഇതാണ് വലിയ പ്രതിഷേധത്തിന് ഇടയാക്കുന്നതും. തുടര്‍ച്ചയായി വില കൂട്ടിയതോടെ വിപണിയില്‍ വിലക്കയറ്റം വരാനും സാധ്യത ഏറുന്നു.

കൊവിഡ് പ്രതിസന്ധിക്കിടെ ഡിമാന്റ് കുറഞ്ഞതോടെ അസംസ്‌കൃത എണ്ണവില ചരിത്രത്തിലെ ഏറ്റവും താഴ്ചയിലെത്തി. ബാരലിന് വെറും 20 ഡോളറെന്ന അവിശ്വസനീയമായ വിലക്കുറവിലേക്ക് എത്തി. എന്നാല്‍ ഒരു പൈസ പോലും ജനങ്ങള്‍ക്ക് നേട്ടമുണ്ടായില്ല. പിന്നീട് രാജ്യാന്തര വിപണിയില്‍ എണ്ണവില അല്‍പം കൂടി. പിന്നെ വൈകിയില്ല, 80 ദിവസത്തിന് ശേഷം രാജ്യത്തെ എണ്ണക്കമ്പനികള്‍ യോഗം ചേര്‍ന്നു, നിരക്ക് കൂട്ടാന്‍ തീരുമാനിച്ചു. ഇന്നേക്ക് തുടര്‍ച്ചയായ ഏഴാം ദിവസമാണ് ഇന്ധനവില കൂട്ടുന്നത്.

SHARE