കോവിഡ് രോഗബാധയെ കുറിച്ച് പുതിയൊരു കണ്ടെത്തലുമായി ലണ്ടന്‍ കിങ് കോളേജിലെ ഒരു സംഘം ഗവേഷകര്‍. രോഗബാധ പലരെയും പലതരത്തില്‍ ബാധിക്കുന്ന സാഹചര്യം കണക്കിലെടുത്ത് നടത്തിയ ഒരു പഠനത്തിലാണ് ആറുതരത്തിലുള്ള രോഗലക്ഷണങ്ങളെ കുറിച്ച് ഗവേഷകര്‍ പറയുന്നത്. ഈ കണ്ടെത്തല്‍ രോഗചികിത്സയില്‍ ഡോക്ടര്‍മാര്‍ക്ക് സഹായകമായേക്കാം എന്നും ഏതു വിഭാഗം രോഗികളില്‍ ആണ് കൂടുതല്‍ ശ്രദ്ധ നല്‍കേണ്ടത് എന്നും ഈ പഠനം പറയുന്നു.
ജൂണ്‍ 16 നു ഓണ്‍ലൈന്‍ വഴി പുറത്തുവിട്ട ഈ പഠനം പക്ഷേ മറ്റു ചില ഗവേഷകര്‍ അംഗീകരിച്ചിട്ടില്ല. എന്തൊക്കെയാണ് ആ ആറു വിഭാഗങ്ങള്‍ എന്ന് നോക്കാം.രോഗതീവ്രത, ശ്വാസതടസം, ഓക്‌സിജന്‍, വെന്റിലേറ്റര്‍ സഹായം വേണമോ തുടങ്ങി പല കാര്യങ്ങളുമായി ബന്ധപ്പെട്ടാവും ഏതു തരത്തിലുള്ള രോഗമാണെന്നു നിശ്ചയിക്കുക. വൈറസ് ബാധയുണ്ടായി അഞ്ചാം ദിവസം ഇതില്‍ ഏതു വിഭാഗത്തില്‍പെട്ടയാളാണു രോഗി എന്നു പ്രവചിക്കാന്‍ കഴിഞ്ഞാല്‍ അവരെ സഹായിക്കാനും പ്രാരംഭഘട്ടത്തില്‍ത്തന്നെ ഇടപെടല്‍ നടത്താനും കഴിയും. രക്തത്തിലെ ഓക്‌സിജന്റെ അളവും പഞ്ചസാരയുടെ അളവും നിരീക്ഷിക്കാനും കൃത്യമായി ജലാംശം ശരീരത്തില്‍ നിലനില്‍ക്കുന്നുണ്ടെന്ന് ഉറപ്പാക്കാനും ഇതുവഴി സാധിക്കുമെന്നും ഗവേഷകര്‍ പറയുന്നു.
ആറു തരം രോഗലക്ഷണങ്ങള്‍
- പനിയില്ലാതെ ഫ്‌ലൂ പോലുള്ള അവസ്ഥ: തലവേദന, ഘ്രാണശേഷി നഷ്ടമാകല്‍, ചുമ, തൊണ്ടവേദന, നെഞ്ചുവേദന
- പനിയോടെ ഫ്‌ലൂ പോലുള്ള അവസ്ഥ: തലവേദന, ഗന്ധം നഷ്ടമാകല്‍, ചുമ, തൊണ്ടവേദന, തൊണ്ടയടപ്പ്, പനി, ദഹനക്കുറവ്.
- ഗാസ്‌ട്രോഇന്റസ്‌റ്റൈനല്‍: തലവേദന, ഗന്ധശേഷി നഷ്ടമാകല്‍, ദഹനക്കുറവ്, വയറിളക്കം, തൊണ്ടവേദന, നെഞ്ചുവേദന, ചുമ ഇല്ലാതിരിക്കല്‍.
- ഗുരുതരമായ ലെവല്‍ 1: തലവേദന, ഗന്ധനഷ്ടം, ചുമ, പനി, തൊണ്ടയടപ്പ്, നെഞ്ചുവേദന, തളര്‍ച്ച
- ഗുരുതരമായ ലെവല്‍ 2: തലവേദന, ഗന്ധനഷ്ടം, ചുമ, പനി, തൊണ്ടയടപ്പ്, നെഞ്ചുവേദന, ദഹനക്കുറവ്, കണ്‍ഫ്യൂഷന്‍, തൊണ്ടവേദന, പേശിവേദന.
- ഗുരുതരമായ ലെവല്‍ 3: തലവേദന, ഗന്ധനഷ്ടം, ചുമ, പനി, തൊണ്ടയടപ്പ്, നെഞ്ചുവേദന, തളര്‍ച്ച, ദഹനക്കുറവ്, തൊണ്ടവേദന, കണ്‍ഫ്യൂഷന്‍, പേശിവേദന, ശ്വാസതടസം, വയറിളക്കം, വയറുവേദന.
