ബെയ്ജിങ്: ടോയ്‌ലറ്റ് ഫ്‌ലഷ് ചെയ്യുന്നതില്‍നിന്നും കോവിഡ് പകരാമെന്ന് പഠനം. ചൈനയിലെ യാങ്ഷൗ യൂണിവേഴ്‌സിറ്റിയാണ് ഈ പഠനം പുറത്തുവിട്ടത്. കോവിഡ് ബാധിതനായ ഒരാളുടെ വിസര്‍ജ്യത്തിലും വൈറസിന്റെ സാന്നിധ്യമുണ്ട്. ഫ്‌ലഷ് ചെയ്യുന്നതു മൂലം ഇത് അന്തരീക്ഷത്തില്‍ പടരാന്‍ സാധ്യതയുണ്ടെന്നും അതിനാല്‍ ക്ലോസറ്റിന്റെ ലിഡ് അടച്ചതിനുശേഷം ഫ്‌ലഷ് ചെയ്യണമെന്നും ഗവേഷകര്‍ പറയുന്നു.
കോവിഡ് ബാധിതന്‍ ഉപയോഗിച്ച ടോയ്‌ലറ്റ് ഫ്‌ലഷ് ചെയ്യുമ്പോള്‍ വൈറസ് കണങ്ങളടങ്ങിയ ജലാംശം ആയിരിക്കും പുറത്തേക്ക് തെറിക്കുക. നഗ്‌നനേത്രങ്ങള്‍ക്കൊണ്ട് കാണാന്‍ കഴിയാത്ത ഇവ അന്തരീക്ഷത്തില്‍ തങ്ങിനില്‍ക്കുകയും മറ്റൊരാള്‍ ഇതേ ശുചിമുറി ഉപയോഗിക്കുന്നതിലൂടെ അയാളിലേക്ക് പ്രവേശിക്കുകയും ചെയ്യും. ഇത്തരത്തിലുള്ള വൈറസ് വ്യാപനം തടയുന്നതിനായി ക്ലോസറ്റിന്റെ ലിഡ് അടച്ചതിനുശേഷം മാത്രമേ ഫ്‌ലഷ് ചെയ്യാന്‍ പാടുള്ളൂ. വാര്‍ത്ത ഏജന്‍സിയായ പി.ടി.ഐയാണ് ചൈനീസ് ഗവേഷകരെ ഉദ്ധരിച്ച് വിവരം പുറത്തുവിട്ടത്.
