കോവിഡ്: രാജ്യത്ത് മരണം 2000 കടന്നു

ന്യൂഡല്‍ഹി: രാജ്യത്തെ കോവിഡ് ബാധിച്ച് മരിച്ചവരുടെ എണ്ണം 2000 കടന്നു. 62,700 പേരാണ് കോവിഡ് ബാധിതര്‍. മഹാരാഷ്ട്ര, ഗുജറാത്ത്, തമിഴ്‌നാട്, ഡല്‍ഹി എന്നീ സംസ്ഥാനങ്ങളില്‍ രോഗബാധിതരുടെ എണ്ണം ഗണ്യമായി കൂടിക്കൊണ്ടിരിക്കുകയാണ്. ഇതരസംസ്ഥാനങ്ങളില്‍ നിന്നുള്ളവരും വിദേശത്തു നിന്നുള്ളവരും തിരിച്ചെത്തിക്കൊണ്ടിരിക്കുന്നതിനാല്‍ വരും ദിവസങ്ങളില്‍ രോഗബാധിതരുടെ എണ്ണം ഇനിയും ഉയരുമെന്നാണ് വിദഗ്ധര്‍ ചൂണ്ടിക്കാട്ടുന്നത്.

മരണങ്ങളില്‍ 42 ശതമാനവും മഹാരാഷ്ട്രയിലാണ്. മഹാരാഷ്ട്രയില്‍ 24 മണിക്കൂറിനിടെ കോവിഡ് സ്ഥിരീകരിച്ചവരുടെ എണ്ണം മൂവായിരത്തിലേറെയാണ്. ആറ് ദിവസം കൊണ്ടാണ് രോഗബാധിതരുടെ എണ്ണം നാല്‍പതിനായിരത്തില്‍ നിന്ന് അറുപതിനായിരത്തിലേക്ക് ഉയര്‍ന്നത്. ആരോഗ്യമന്ത്രാലയത്തിന്റെ കണക്കനുസരിച്ച് ശനിയാഴ്ച്ച വരെ 1,981 പേര്‍ കോവിഡ് ബാധിച്ചു മരിച്ചു. രോഗബാധിതരുടെ എണ്ണം 59,662 ആയി. 24 മണിക്കൂറിനിടയില്‍ 95 മരണങ്ങളും 3,320 പുതിയ കേസുകളും റിപ്പോര്‍ട്ട് ചെയ്തു.

അതേസമയം, കോവിഡ് ബാധയില്‍ നിന്നും കരകയറാനാവാതെ ലോക രാജ്യങ്ങള്‍ കുഴയുകയാണ്. ലോകത്ത് കൊറോണ ബാധിതരുടെ എണ്ണം 41 ലക്ഷം കടന്നു. അതേസമയം, 2,80,000ല്‍ അധികം പേര്‍ക്കാണ് ഇതുവരെ ജീവന്‍ നഷ്ടമായത്. അമേരിക്കയിലും ബ്രിട്ടണിലും സ്ഥിതി ഗുരുതരമായി തുടരുകയാണ്. അമേരിക്കയില്‍ മാത്രം മരണം 80,000 ത്തോടടുക്കുകയാണ്.

ലോകത്ത് ഏറ്റവും കൂടുതല്‍ കൊറോണ രോഗികള്‍ ഉള്ളത് അമേരിക്കയിലാണ്. അവിടെ രോഗബാധിതരുടെ എണ്ണം 1,347,309 ആയി. എന്നാല്‍, ന്യൂ യോര്‍ക്ക്, ന്യൂ ജേഴ്‌സി എന്നീ തീവ്രബാധിത സംസ്ഥാനങ്ങളില്‍ മെച്ചപ്പെട്ട കണക്കുകളാണ്. സ്‌പെയിനില്‍ 2,666 പേര്‍ക്കാണ് പുതുതായി കൊറോണ വൈറസ് ബാധ സ്ഥിരീകരിച്ചത്.

കൊറോണ ബാധിച്ച് അമേരിക്കയില്‍ ഇനിയും മരണം ഉണ്ടാകുമെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ് പറഞ്ഞു. വാക്‌സിന്‍ ഇല്ലാതെതന്നെ കൊറോണ അപ്രത്യക്ഷമാകുമെന്നും ട്രംപ് വ്യക്തമാക്കി. റഷ്യയില്‍ പുതിയ പതിനായിരം കൊറോണ കേസുകള്‍ കൂടി റിപ്പോര്‍ട്ട് ചെയ്തു.

ബ്രിട്ടനില്‍ ആകെ രോഗബാധിതരുടെ എണ്ണം രണ്ട് ലക്ഷത്തി പതിനയ്യായിരം കടന്നു. വൈറസ് നിയന്ത്രണ വിധേയമായില്ലെങ്കിലും അടുത്ത ആഴ്ച മുതല്‍ ലോക്ക് ഡൗണ്‍ നിയന്ത്രണങ്ങള്‍ ലഘൂകരിക്കാനാണ് സാധ്യത. ഇന്ത്യയിലും കൊറോണ ബാധിതരുടെ എണ്ണം കുതിച്ചുയരുകയാണ്.

SHARE