ന്യൂഡല്‍ഹി: പ്രധാനമന്ത്രിയുടെ സാമ്പത്തിക പാക്കേജിന് വിമര്‍ശനവുമായി കോണ്‍ഗ്രസ് നേതൃത്വം. കോണ്‍ഗ്രസ് വക്താവ് ജയ്വീര്‍ ഷെര്‍ഗിലാണ് ഇത്തരത്തില്‍ ഒരു പ്രതികരണം നടത്തിയത്. 100 ദിവസത്തിനുള്ളില്‍ കള്ളപ്പണം തിരിച്ചുപിടിക്കും, ഗംഗയെ ശുദ്ധീകരിക്കും, ഭീകരവാദത്തിന് അന്ത്യം കുറിക്കും എന്നീ വാഗ്ദാനങ്ങള്‍ എഴുതിയ പേന കൊണ്ട് ആവരുതേ 20 ലക്ഷം കോടിയുടെ പാക്കേജ് തയാറാക്കിതെന്ന് അദ്ദേഹം ട്വിറ്ററില്‍ കുറിച്ചു.
‘പ്രധാനമന്ത്രിയുടെ സാമ്പത്തിക പാക്കേജിനായി കാത്തിരിക്കുകയായിരുന്നു. വൈകിയായാണെങ്കിലും വന്നല്ലോ. ഇതിനെ സ്വാഗതം ചെയ്യുന്നു. വിശദമായ പ്രഖ്യാപനം വരുമ്പോഴെ ഏതൊക്കെ മേഖലകള്‍ക്കാണ് പാക്കേജിന്റെ നേട്ടം ലഭിക്കുമെന്ന് മനസിലാകൂ’ എന്ന് രാജസ്ഥാന്‍ മുഖ്യമന്ത്രി അശോക് ഘഹ്ലോട്ട് പറയുന്നു.
രാഹുല്‍ ഗാന്ധി പ്രധാനമന്ത്രിയുടെ പ്രഖ്യാപനത്തിന് മുന്‍പ് തന്നെ സമൂഹ മാധ്യമത്തിലൂടെ ലോക്ക് ഡൗണിലെ ജനത്തിന്റെ കഷ്ടപ്പാട് കാണിച്ചുതരുന്ന ദൃശ്യങ്ങള്‍ പങ്കുവച്ചിരുന്നു. മക്കള്‍ക്ക് ഭക്ഷണം ലഭിക്കാതിരിക്കുന്നത് കണ്ട് ഭാരതമാത കരയുകയാണെന്നും അദ്ദേഹം വിഡിയോയില്‍ പറയുന്നു. ആളുകളെ സുരക്ഷിതരായി വീടുകളില്‍ എത്തിക്കുകയും അവരുടെ അക്കൗണ്ടുകളില്‍ പണം നിക്ഷേപിക്കുകയും വേണമെന്നും രാഹുല്‍ ആവശ്യപ്പെട്ടു.
കൂടാതെ ഇതര സംസ്ഥാന തൊഴിലാളികളുടെ കഷ്ടപ്പാടുകളെക്കുറിച്ചും കോണ്‍ഗ്രസ് വക്താവായ രണ്‍ദീപ് സുര്‍ജേവാല പ്രതികരിച്ചു. ഇതര സംസ്ഥാന തൊഴിലാളികളുടെ ദുരിതത്തെക്കുറിച്ച് ഒന്നും ഉരിയാടാത്ത പ്രധാനമന്ത്രിയില്‍ ഇന്ത്യ അസംതൃപ്തയാണെന്ന് അദ്ദേഹം പറഞ്ഞു.
