സ്ത്രീയായി ജീവിക്കണം; അനുമതി തേടി പ്ലസ്ടു വിദ്യാര്‍ഥി

മലപ്പുറം: തനിക്കുള്ളിലുള്ളത് ഒരു സ്ത്രീയാണെന്നും അതിനാല്‍ തനിക്ക് സ്ത്രീകള്‍ക്കൊപ്പം ജീവിക്കണമെന്നും ആവശ്യപ്പെട്ട് മലപ്പുറത്തെ പ്ലസ് ടു വിദ്യാര്‍ഥി. മലപ്പുറം കരുവാരക്കുണ്ടിലെ 17വയസ്സുകാരനാണ് ആവശ്യവുമായി രംഗത്ത് വന്നത്. താന്‍ മനസുകൊണ്ടൊരു സ്ത്രീയാണെന്ന് ആദ്യം വീട്ടുകാരോടാണ് തുറന്ന് പറഞ്ഞത്. എന്നാല്‍ ഇത് കുട്ടിയുടെ മാനസിക പ്രശ്‌നമായി വീട്ടുകാര്‍ കാണുകയായിരുന്നു. തുടര്‍ന്ന് വീട്ടില്‍ അടച്ചുപൂട്ടിയിരുന്ന അവസ്ഥവരെയുണ്ടായി. തുടര്‍ന്ന് കുടുംബാംഗങ്ങളോടു വഴക്കിട്ട് വീടു വിട്ടിറങ്ങിയ കുട്ടിയെ കൗണ്‍സിലര്‍ മുഖേന കണ്ടെത്തി ചൈല്‍ഡ് വെല്‍ഫെയര്‍ കമ്മിറ്റിക്ക് മുന്‍പില്‍ ഹാജരാക്കുകയായിരുന്നു.

കുട്ടി ട്രാന്‍സ്‌ജെന്‍ഡര്‍ വിഭാഗത്തിലേക്കുള്ള പരിവര്‍ത്തന ദശയിലാണെന്നു വിലയിരുത്തിയ ചെയര്‍മാന്‍ പി ഷാജേഷ് ഭാസ്‌കര്‍ ഒരു മാസത്തേക്കു ട്രാന്‍സ്‌ജെന്‍ഡര്‍ പ്രതിനിധിയായ റിയയുടെ സംരക്ഷണത്തില്‍ അയച്ചു.ഉപദ്രവവും പരിഹാസവും കുട്ടിയുടെയുള്ളില്‍ സ്ത്രീത്വമാണെന്ന് കൗണ്‍സിലിംഗിലൂടെ കണ്ടെത്തുകയും ചെയ്തിട്ടുണ്ട്. സ്ത്രീകളെപോലെ പെരുമാറുന്നതുകൊണ്ടുതന്നെ ലൈംഗികമായി ഉപദ്രവശ്രമങ്ങളും പലയിടത്തുനിന്നുമുണ്ടായി. ഇപ്രാവശ്യം പ്ലസ്ടു പരീക്ഷ എഴുതിയ 17വയസ്സുകാരന്‍ പരീക്ഷ കഴിഞ്ഞ ശേഷം കോഴിക്കോട് ഹോട്ടല്‍ ജോലിക്കുപോയിരുന്നു. വീട്ടുകാരുടെ ഉപദേശം കേട്ട് ജോലിക്കുപോയെങ്കിലും അവിടെയൊന്നും നിലയുറപ്പിക്കാന്‍ കഴിഞ്ഞില്ല. ആളുകള്‍ അപഹാസ്യരാക്കുകയായിരുന്നുവെന്ന് കുട്ടി പറഞ്ഞു.

മുമ്പ് കുട്ടിപഠിക്കുന്ന സ്‌കൂളില്‍ കൗണ്‍സിലിംഗ് ക്ലാസെടുക്കാന്‍ ട്രാന്‍സ്‌ജെന്‍ഡര്‍ പ്രതിനിധിയായ റിയ എത്തിയപ്പോഴും കുട്ടി തന്റെ വ്യക്തിത്വത്തെ കുറിച്ചു സംസാരിച്ചിരുന്നു. എന്നാല്‍ ആദ്യം കൗണ്‍സിലിംഗ് ചെയ്തശേഷം തീരുമാനിക്കാമെന്നായിരുന്നു റിയ മറുപടി നല്‍കിയത്. തുടര്‍ന്ന കൗണ്‍സിലിംഗ് നല്‍കിയെങ്കിലും തീരുമാനത്തില്‍ മാറ്റമൊന്നും ഉണ്ടായില്ല. ചൈല്‍ഡ് വെല്‍ഫെയര്‍ കമ്മിറ്റിക്ക് മുന്നില്‍ ഹാജരാക്കിയ കുട്ടി ട്രാന്‍സ്‌ജെന്‍ഡര്‍ വിഭാഗത്തിലേക്കുള്ള പരിവര്‍ത്തന ദശയിലാണെന്നു വിലയിരുത്തുകയായിരുന്നുവെന്ന് ചെയര്‍മാന്‍ പി.ഷാജേഷ് ഭാസ്‌കര്‍ പറഞ്ഞു. ഇതിനെ തുടര്‍ന്നാണ് ഒരുമാസത്തേക്കു ട്രാന്‍സ്‌ജെന്‍ഡര്‍ പ്രതിനിധിയുടെ സംരക്ഷണത്തില്‍ അയച്ചത്.

വീട്ടില്‍നിന്നു സ്വന്തം ഇഷ്ടപ്രകാരം ഇറങ്ങിപ്പോന്നതാണെന്നും സ്ത്രീയായി ജീവിക്കാനാണ് ആഗ്രഹമെന്നും അതിനുള്ള പക്വത തനിക്കുണ്ടെന്നും 17 വയസ്സുകാരന്‍ ചൈല്‍ഡ് വെല്‍ഫെയര്‍ കമ്മിറ്റി അംഗങ്ങളെ അറിയിച്ചു. ട്രാന്‍സ്‌ജെന്‍ഡര്‍ വിഭാഗത്തിലുള്ള ആള്‍ക്കൊപ്പം താമസിക്കാനാണ് താല്‍പര്യമെന്നും വ്യക്തമാക്കി. കുട്ടിയെയും ബന്ധുക്കളെയും കൗണ്‍സലിങ്ങിന് വിധേയമാക്കുകയും വിശദമായി മൊഴിയെടുക്കുകയും ചെയ്തശേഷമാണ് കമ്മിറ്റി ഉത്തരവിട്ടത്. ആഴ്ചയിലൊരിക്കല്‍ കുട്ടിയെ സന്ദര്‍ശിക്കാന്‍ കുടുംബാംഗങ്ങള്‍ക്ക് അനുമതി നല്‍കുകയും ചെയ്തിട്ടുണ്ട്.

SHARE