പത്തനംതിട്ട: തിരുവല്ലയില്‍ വാഹനാപകടത്തില്‍ പരിക്കേറ്റ യുവാവിന് ദാരുണാന്ത്യം. അപകടം നടന്നിട്ടും ആളുകള്‍ ആശുപത്രിയിലെത്തിക്കാതെ കാഴ്ചക്കാരായി നില്‍ക്കുകയായിരുന്നു. തലവഴി സ്വദേശി ജിബുവാണ് മരിച്ചത്.
മാവേലിക്കര തിരുവല്ല സംസ്ഥാന പാതയില്‍ പുളിക്കീഴില്‍ ശനിയാഴ്ച രാവിലെയാണ് അപകടമുണ്ടായത്. യുവാക്കള്‍ സഞ്ചരിച്ചിരുന്ന ബൈക്ക് മഴയില്‍ തെന്നിമാറി എതിര്‍ വശത്ത് നിന്ന് വന്ന കാറില്‍ ഇടിക്കുകയായിരുന്നു. കാറോടിച്ചിരുന്ന നിരണം പ്രാഥമിക ആരോഗ്യ കേന്ദ്രത്തിലെ ഡോക്ടര്‍ ദീപ്തി ആശുപത്രിയിലെത്തിക്കാന്‍ സഹായം തേടിയെങ്കിലും സ്ഥലത്ത് ഉണ്ടായിരുന്നവര്‍ കാഴ്ചക്കാരായി നിന്നു. 20 മിനിറ്റാണ് യുവാക്കള്‍ റോഡില്‍ കിടന്നത്.
അപകടത്തില്‍പ്പെട്ട ബൈക്ക് ഓടിച്ചിരുന്ന ജിബു ആശുപത്രിയില്‍ എത്തിക്കവെ രക്തം വാര്‍ന്ന് മരിച്ചു. ഒപ്പമുണ്ടായിരുന്ന സുഹൃത്ത് ജെബിനും സാരമായി പരിക്കേറ്റു. കോവിഡ് ആശങ്ക കാരണമാകാം ജനങ്ങള്‍ മാറിനിന്നതെന്ന് പൊലീസ് പറഞ്ഞു. അപകടങ്ങള്‍ ഉണ്ടായാല്‍ ഇനിയെങ്കിലും 112ല്‍ വിളിച്ച് സഹായം തേടണമെന്ന് പത്തനംതിട്ട എസ്പി പറഞ്ഞു.
